നാല് ദിവസത്തെ മുജാഹിദ് സംസ്ഥാന സമ്മേളനത്തിന് മലപ്പുറം കൂരിയാട് സലഫി നഗറില്‍ ഉജ്വല തുടക്കമായി. ജംഇയ്യത്ത് അഹ്ലെ ഹദീസ് അഖിലേന്ത്യ അധ്യക്ഷന്‍ മൗലാന അസ്ഗറലി ഇമാം മഹ്ദി അസ്സലഫി ഉദ്ഘാടനം ചെയ്തു. ഭക്ഷണം, വസ്ത്രം, ചിന്ത, വിശ്വാസം എന്നിവയുടെ പേരില്‍ മനുഷ്യരെ ഭിന്നിപ്പിക്കുന്ന നീക്കത്തിന് ഭരണകൂടം കൂട്ടുനില്‍ക്കരുതെന്ന് അദ്ദേഹം പറഞ്ഞു. രാജ്യത്തിെന്‍റ ആത്മാവില്‍ ഉള്‍ച്ചേര്‍ന്ന ബഹുസ്വരത ഇല്ലാതാക്കാന്‍ ശ്രമിക്കുന്നവരെ ഒറ്റപ്പെടുത്തണം. ചരിത്ര പൈതൃകങ്ങള്‍ മായ്ച്ചുകളയാനും വര്‍ഗീയവത്കരിക്കാനുമുള്ള ശ്രമം പരാജയപ്പെടുത്തണം. ആഗോള ഭീകരസംഘടനയായ ഐ.എസ് അതിെന്‍റ ജന്മസ്ഥലത്തുതന്നെ അന്ത്യശ്വാസം വലിക്കുമ്ബോള്‍ അവരുടെ ദുഷ്പ്രചാരണത്തില്‍ വഞ്ചിതരാകുന്നവര്‍ അവിവേകികളാണ്. മതത്തെ യഥാര്‍ഥ ഉറവിടത്തില്‍നിന്ന് മനസ്സിലാക്കാത്തവരെയാണ് മതവിരോധികള്‍ തട്ടിയെടുക്കുന്നതെന്നും അദ്ദേഹം ഒാര്‍മിപ്പിച്ചു.
കേരള ജംഇയ്യതുല്‍ ഉലമ പ്രസിഡന്‍റ് ടി.കെ. മുഹ്യുദ്ദീന്‍ ഉമരി അധ്യക്ഷത വഹിച്ചു. കെ.എന്‍.എം പ്രസിഡന്‍റ് ടി.പി. അബ്ദുല്ലക്കോയ മദനി, വൈസ് പ്രസിഡന്‍റ് ഡോ. ഹുസൈന്‍ മടവൂര്‍, ജനറല്‍ സെക്രട്ടറി പി.പി. ഉണ്ണീന്‍കുട്ടി മൗലവി, പി.കെ. അഹമ്മദ്, എം. സ്വലാഹുദ്ദീന്‍ മദനി, പ്രഫ. എന്‍.വി. അബ്ദുറഹ്മാന്‍, നൂര്‍ മുഹമ്മദ് നൂര്‍ഷ, സ്വാഗതസംഘം ചെയര്‍മാന്‍ വി.കെ. സക്കരിയ്യ, ഐ.എസ്.എം പ്രസിഡന്‍റ് ഡോ. എ.ഐ. അബ്ദുല്‍ മജീദ് സ്വലാഹി തുടങ്ങിയവര്‍ പങ്കെടുത്തു.
സുവനീര്‍ പ്രകാശനം പി.കെ. അബ്ദുറബ്ബ് എം.എല്‍.എയും പുസ്തക പ്രകാശനം പി.കെ. ബഷീര്‍ എം.എല്‍.എയും നിര്‍വഹിച്ചു. മുസ്ലിംലീഗ് സംസ്ഥാന ജനറല്‍ സെക്രട്ടറി കെ.പി.എ. മജീദ്, ബി.ജെ.പി ദേശീയ നിര്‍വാഹകസമിതി അംഗം അഡ്വ. പി.എസ്. ശ്രീധരന്‍ പിള്ള, അഡ്വ. കെ.എന്‍.എ. ഖാദര്‍ എം.എല്‍.എ, മലപ്പുറം ജില്ല പഞ്ചായത്ത് പ്രസിഡന്‍റ് എ.പി. ഉണ്ണികൃഷ്ണന്‍ എന്നിവര്‍ ആശംസ നേര്‍ന്നു. വൈകീട്ട് ഇന്‍റര്‍ഫെയ്ത്ത് ഡയലോഗ് ന്യൂനപക്ഷ കമീഷന്‍ ചെയര്‍മാന്‍ ജസ്റ്റിസ് പി.കെ. ഹനീഫ ഉദ്ഘാടനം ചെയ്തു. വെള്ളിയാഴ്ച രാവിലെ 10ന് ഖുര്‍ആന്‍ സമ്മേളനം മൗലാന അബ്ദുല്‍ ഗനി ഹൈദരാബാദ് ഉദ്ഘാടനം ചെയ്യും. 2.30ന് ഹദീസ് സമ്മേളനം മൗലാന അബൂ സഹ്ബാന്‍ റൂഹുല്‍ ഖുദ്സ് നദ്വി ലക്നൗ ഉദ്ഘാടനം ചെയ്യും. നാലിന് നവോത്ഥാന സമ്മേളനം മുന്‍ കേന്ദ്രമന്ത്രി സല്‍മാന്‍ ഖുര്‍ഷിദ് ഉദ്ഘാടനം ചെയ്യും. വൈകീട്ട് 6.30ന് സാംസ്കാരിക സമ്മേളനം മുന്‍ മഹാരാഷ്ട്ര ഗവര്‍ണര്‍ കെ. ശങ്കരനാരായണന്‍ ഉദ്ഘാടനം ചെയ്യും.
