തൃശ്ശൂര്: മാന്നാമംഗലം സെന്റ് മേരീസ് പള്ളിയില് ഓര്ത്തഡോക്സ് യാക്കോബായ വിഭാഗങ്ങള് തമ്മില് സംഘര്ഷം. രാത്രി 12 മണിയോടെ ഓര്ത്തഡോക്സ് വിഭാഗം ഗേറ്റ് തകര്ത്ത് പള്ളിയിലേക്ക് കടക്കാന് ശ്രമിച്ചതോടെയാണ് സംഘര്ഷമുണ്ടായത്. ഇരു വിഭാഗങ്ങളും തമ്മില് കല്ലേറുണ്ടായി.
സംഭവത്തില് ഓര്ത്തഡോക്സ് തൃശ്ശൂര് ഭദ്രാസനാധിപന് യൂഹന്നാന് മാര് മിലിത്തിയൂസ് ഉള്പ്പെടെ നിരവധി പേര്ക്ക് പരിക്കേറ്റു. പരിക്കേറ്റ പതിനഞ്ചോളം പേരെ ആശുപത്രിയിലേക്ക് മാറ്റി. പ്രതിഷേധക്കാരെ പൊലീസ് അറസ്റ്റ് ചെയ്ത് നീക്കി. സമരപ്പന്തല് പൊലീസ് പൂര്ണ്ണമായും ഒഴിപ്പിച്ചു.
പാത്രിയാര്ക്കിസ് വിഭാഗത്തിന് കീഴിലുള്ള പള്ളിയില് ആരാധന നടത്താന് അനുവദിക്കണമെന്നാവശ്യപ്പെട്ടാണ് ഓര്ത്തഡോക്സ് വിഭാഗം സമരം ചെയ്തത്. തങ്ങള്ക്കനുകൂലമായ കോടതി വിധി ചൂണ്ടിക്കാട്ടിയായിരുന്നു സമരം. എന്നാല് പള്ളിയില് കയറാന് അനുവദിക്കാതെ യാക്കോബായ വിഭാഗവും പള്ളിയ്ക്കകത്ത് നിലയുറപ്പിക്കുകയായിരുന്നു.