ഇന്ത്യയില്‍ ഏറെ വിവാദങ്ങള്‍ക്കും പ്രക്ഷോഭങ്ങള്‍ക്കും കാരണമായ സഞ്ജയ് ലീല ഭന്‍സാലി ചിത്രം ‘പത്മാവത്’ പാകിസ്താനില്‍ പൂര്‍ണമായും പ്രദര്‍ശിപ്പിക്കും. ഇന്ത്യയില്‍ നീക്കം ചെയ്ത ചിത്രത്തിെന്‍റ ഭാഗങ്ങള്‍ ഉള്‍െപ്പടെ പാകിസ്താനില്‍ പ്രദര്‍ശിപ്പിക്കുന്നതിന് ഇസ്ലാമാബാദ് സെന്‍സര്‍ ബോര്‍ഡ് അനുമതി നല്‍കി.
പത്മാവതിന് പ്രദര്‍ശനാനുമതി നല്‍കിയതായി ഇസ്ലാബാദിലെ സെന്‍ട്രല്‍ ബോര്‍ഡ് ഒാഫ് ഫിലിം സര്‍ട്ടിഫിക്കേഷന്‍ ചെയര്‍മാന്‍ മൊബശീര്‍ ഹസന്‍ സമൂഹമാധ്യമങ്ങളിലൂടെ അറിയിച്ചു. ഇന്ത്യന്‍ ചിത്രമായ പത്മാവത് രംഗങ്ങള്‍ മുറിച്ചുനീക്കാതെ പ്രദര്‍ശിപ്പിക്കുമെന്നും ചിത്രത്തിന് ‘യു’ സര്‍ട്ടിഫിക്കറ്റ് നല്‍കിയെന്നുമാണ് ചെയര്‍മാന്‍ ട്വിറ്ററില്‍ കുറിച്ചത്.
ഡല്‍ഹി സുല്‍ത്താനായിരുന്ന അലാവുദ്ദീന്‍ ഖില്‍ജിയെ മോശമായി ചിത്രീകരിച്ചുെവന്ന് ആരോപിച്ച്‌ ചിത്രത്തിലെ രംഗങ്ങള്‍ നീക്കം ചെയ്യേണ്ടിവരുമെന്ന് ചിത്രത്തിലെ അണിയറപ്രവര്‍ത്തകര്‍ ഭയപ്പെട്ടിരുന്നു. എന്നാല്‍, ആരോഗ്യപരമായ കലകളെയും കണ്ടുപിടിത്തങ്ങളെയും സി.ബി.എഫ്.സി പ്രോത്സാഹിപ്പിക്കുമെന്ന് മൊബശീര്‍ ഹസന്‍ ട്വിറ്ററിലൂടെ അറിയിച്ചു.
