തിരുവനന്തപുരം: നിയമസഭയില് പ്രതിപക്ഷ എംഎല്എമാരോട് സ്പീക്കര് അസഹിഷ്ണുത കാട്ടുകയാണെന്ന് പ്രതിപക്ഷ നേതാവ് രമേശ് ചെന്നിത്തല. മന്ത്രിമാര്ക്കും ഭരണപക്ഷ എംഎല്എമാര്ക്കും ചോദ്യം ചോദിക്കാനും മറുപടി പറയാനും ധാരാളം സമയം സ്പീക്കര് അനുവദിക്കുന്നുണ്ട്. എന്നാല് പ്രതിപക്ഷ എംഎല്എമാര് ചോദ്യങ്ങള് ഉന്നയിക്കുന്പോള് അദ്ദേഹം അസഹിഷ്ണുത പ്രകടിപ്പിച്ചുകൊണ്ട് സമയം അനുവദിക്കാതെ ഇടപെടുകയാണെന്ന് ചെന്നിത്തല സഭയില് ആരോപിച്ചു.
പെട്രോള്-ഡീസല് വിലവര്ധനവ് സംബന്ധിച്ച് താന് നടത്തിയ അഭിപ്രായ പ്രകടനത്തില് സ്പീക്കര് ഇടപെട്ടതാണ് പ്രതിപക്ഷ നേതാവിനെ ചൊടിപ്പിച്ചത്. പെട്രോളിന്റെയും ഡീസലിന്റെയും വില വര്ധിക്കുന്പോള് സംസ്ഥാനത്തിന് ലഭിക്കേണ്ട നികുതി ഒഴിവാക്കാന് നടപടിയെടുക്കണമെന്നും മുന്പ് ഉമ്മന് ചാണ്ടി സര്ക്കാരിന്റെ കാലത്ത് വില വര്ധനവുണ്ടായ സമയങ്ങളില് സംസ്ഥാനത്തിന് ലഭിക്കേണ്ട നികുതി വേണ്ടെന്ന് വച്ച കാര്യവും പ്രതിപക്ഷ നേതാവ് സഭയെ ഓര്മിപ്പിച്ചു.
