ന്യൂഡല്ഹി: മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസിന് സുപ്രീം കോടതിയുടെ നോട്ടീസ്. ദേവേന്ദ്ര ഫഡ്നാവിസിനെ അയോഗ്യനാക്കണമെന്ന് ആവശ്യപ്പെട്ട് അഭിഭാഷകനും സാമൂഹികപ്രവര്ത്തകനുമായ സതീഷ് ഉകേ സമര്പ്പിച്ച ഹര്ജി പരിഗണിക്കവേയാണ് കോടതിയുടെ നടപടി.
2014ലെ നിയമസഭാ തിരഞ്ഞെടുപ്പില് നാമനിര്ദേശപത്രിക സമര്പ്പിച്ചപ്പോള്, പേരിലുള്ള ക്രിമിനല് കേസുകള് ഫഡ്നാവിസ് മറച്ചുവച്ചെന്നും ഇക്കാരണം മുന്നിര്ത്തി അദ്ദേഹത്തെ അയോഗ്യനാക്കണമെന്നും ആവശ്യപ്പെട്ടാണ് സതീഷ് കോടതിയെ സമീപിച്ചത്.
ചീഫ് ജസ്റ്റിസ് രഞ്ജന് ഗൊഗോയ്, ജസ്റ്റിസുമാരായ എസ് കെ കൗള്, കെ എം ജോസഫ് എന്നിവരടങ്ങിയ ബെഞ്ചാണ് പ്രതികരണം ആവശ്യപ്പെട്ട് ഫഡ്നാവിസിന് നോട്ടീസ് അയച്ചത്.
ഫഡ്നാവിസിനെ അയോഗ്യനാക്കണമെന്ന് ആവശ്യപ്പെട്ട് സതീഷ് സമര്പ്പിച്ച ഹര്ജി നേരത്തെ ബോംബെ ഹൈക്കോടതി തള്ളിയിരുന്നു. ഇതിനു പിന്നാലെ ബോംബെ ഹൈക്കോടതി വിധിക്കെതിരെ സതീഷ് സുപ്രീം കോടതിയെ സമീപിക്കുകയായിരുന്നു.