കൊച്ചി: നടിയെ ആക്രമിച്ച കേസില്‍ സി.ബി.ഐ അന്വേഷണം ആവശ്യപ്പെട്ട് നടന്‍ ദിലീപ് ഹൈകോടതിയില്‍ ഹരജി നല്‍കി. സംസ്ഥാന പൊലീസിന്റെ അന്വേഷണത്തില്‍ അതൃപ്തി രേഖപ്പെടുത്തി അഭിഭാഷകന്‍ മുഖേനയാണ് ഹരജി നല്‍കിയത്.
സംസ്ഥാന പൊലീസ് അന്വേഷണം പക്ഷപാതപരമായിരുന്നെന്നും പ്രതിയുടെ മൊഴിയുടെ അടിസ്ഥാനത്തിലാണ് തന്നെ പ്രതി ചേര്‍ത്തിരിക്കുന്നതെന്നും ദിലീപ് ഹരജിയില്‍ പറയുന്നു. തനിക്കെതിരെ കാര്യമായ തെളിവുകളില്ല. പൊലീസ് അന്വേഷണത്തില്‍ വിശ്വാസമില്ല. സി.ബി.ഐ അന്വേഷിച്ചാല്‍ മാത്രമേ സത്യം പുറത്തുവരികയുള്ളൂ. അതുകൊണ്ട് കേന്ദ്ര ഏജന്‍സിയെ കൊണ്ട് അന്വേഷിപ്പിക്കണമെന്നും ദിലീപ് ഹരജിയില്‍ ആവശ്യപ്പെടുന്നു. ഹരജി അടുത്ത ദിവസം കോടതി പരിഗണിക്കും.
എന്നാല്‍ ദിലീപിന്റെ നീക്കം വിചാരണ നീട്ടാനുള്ള തന്ത്രമാണെന്നാണ് അന്വേഷണം സംഘവും പ്രോസിക്യൂഷനും വിലയിരുത്തുന്നത്. കേസുമായി ബന്ധപ്പെട്ട ചില ഹരജികള്‍ പരിഗണിക്കുന്നതിന് പ്രത്യേക കോടതി വേണമെന്നാവശ്യപ്പെട്ടു കൊണ്ട് നടിയടക്കമുള്ളവര്‍ ജില്ലാ കോടതിയെ സമീപിച്ചിരുന്നു. ഇതിന്റെ വിധി 18ാം തീയതി വരികയാണ്. അങ്ങനെ വന്നാല്‍ 18ന് ശേഷം തന്നെ കേസ് വിചാരണ നടപടിയിലേക്ക് പോകാന്‍ കോടതി നിര്‍ദേശിക്കും. ഇൗ സാഹചര്യത്തില്‍ വിചാരണ നടക്കുന്നത് ഒഴിവാക്കുക എന്ന ഉദ്ദേശത്തോടുകൂടിയാണ് ദിലീപിന്റെ നീക്കം.
മുമ്പും പല കേസുകളിലും ഇങ്ങനെ പ്രതികള്‍ കേന്ദ്ര ഏജന്‍സികളുടെ അന്വേഷണം ആവശ്യപ്പെട്ട് ഹരജി നല്‍കിയിരുന്നുവെന്നും അതിന് കോടതി നല്‍കിയ മറുപടി- പ്രതികള്‍ക്ക് പ്രത്യേക ഏജന്‍സിയെ കൊണ്ട് അന്വേഷിപ്പിക്കണം എന്ന് ആവശ്യപ്പെടാനുള്ള അവകാശമില്ല എന്നായിരുന്നുവെന്ന് പ്രോസിക്യൂഷന്‍ വ്യക്തമാക്കുന്നത്.
