ന്യൂഡല്ഹി: ഹിന്ദുത്വവാദികളുടെ എതിര്പ്പ് മൂലം കര്ണാടക സംഗീതജ്ഞന് ടി.എം.കൃഷ്ണയുടെ ഡല്ഹിയിലെ പരിപാടി എയര്പോര്ട്ട് അഥോറിറ്റി ഓഫ് ഇന്ത്യ(എഎഐ) റദ്ദാക്കി. കേന്ദ്ര സര്ക്കാരിനെതിരെ കടുത്ത വിമര്ശനമുന്നയിച്ച കൃഷ്ണയ്ക്കെതിരെ വലതുപക്ഷ ട്രോള് ആക്രമണം വ്യാപകമായതോടെയാണ് തീരുമാനം. എന്നാല് പരിപാടി പിന്നീട് നടത്തുമെന്ന് എഎഐ ട്വീറ്റില് അറിയിച്ചു.
നവംബര് 17,18 തീയതികളില് ഡല്ഹി ചാണക്യപുരി നെഹ്റു പാര്ക്കില് “ഡാന്സ് ആന്ഡ് മ്യൂസിക് ഇന് പാര്ക്ക്” ഫെസ്റ്റിവലിന്റെ ഭാഗമായി നടത്താനിരുന്ന പരിപാടിയാണ് മാറ്റിവെച്ചത്. ഡല്ഹിയിലെ പത്രങ്ങളിലും വന് പരസ്യ പ്രചാരണവും നടത്തിയിരുന്നു. എഎഐയും സംസ്കാരിക സംഘടനയുമായിരുന്നു പരിപാടിയുടെ സംഘാടകര്.
എന്നാല് ടി.എം.കൃഷ്ണ ദേശ വിരുദ്ധനാണെന്നും നക്സലാണെന്നുമുള്ള ട്രോള് ആക്രമണങ്ങള് വന്നതോടെ പരിപാടി റദ്ദാക്കാനുള്ള തീരുമാനത്തില് എത്തുകയായിരുന്നു. പരിപാടി മാറ്റിവെച്ച കാര്യം എഎഐ ട്വിറ്ററിലൂടെ അറിയിച്ചു. എന്നാല് റദ്ദാക്കാനുള്ള കാരണം വ്യക്തമാക്കിയിട്ടില്ല.