ജിഎസ്ടി കൗണ്സിലിന്റെ 56-ാമത് യോഗം സെപ്റ്റംബർ 3, 4 തീയതികളില് ദില്ലിയില് നടക്കും. ധനമന്ത്രി നിർമ്മല സീതാരാമന്റെ അധ്യക്ഷതയിലാണ് യോഗം.കൗണ്സില് യോഗത്തിന് മുന്നോടിയായി സെപ്റ്റംബർ 2ന് ദില്ലിയില് ഓഫീസർമാരുടെ യോഗം ചേരും.
യോഗത്തിന്റെ അജണ്ടയെക്കുറിച്ച് കൗണ്സില് അംഗങ്ങളെ ഇതുവരെ അറിയിച്ചിട്ടില്ല. രണ്ട് ദിവസങ്ങളിലും രാവിലെ 11 മണിക്കായിരിക്കും യോഗം ചേരുകയെന്നും യോഗങ്ങളുടെ അജണ്ടയും വേദിയുടെ വിശദാംശങ്ങളും പിന്നീട് പങ്കിടുമെന്നും അംഗങ്ങള്ക്ക് നല്കിയ കത്തില് പറയുന്നു.
ജിഎസ്ടി കൗണ്സിലിലെ എല്ലാ അംഗങ്ങളെയും ചർച്ചകളില് പങ്കെടുക്കാൻ ക്ഷണിച്ചിട്ടുണ്ട്.
ഇത്തവണത്തെ ജിഎസ്ടി കൗണ്സില് യോഗത്തില്, ആരോഗ്യ, ലൈഫ് ഇൻഷുറൻസ് ജിഎസ്ടി, നഷ്ടപരിഹാര സെസ് എന്നിവയെക്കുറിച്ചുള്ള ചർച്ചകള് ഉണ്ടായേക്കും.എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ധനമന്ത്രിമാർ ഉള്പ്പെടുന്നതാണ് ജിഎസ്ടി കൗണ്സില്.
12, 28 ശതമാനം സ്ലാബുകള് ഒഴിവാക്കണമെന്ന കേന്ദ്ര സർക്കാർ നിർദേശത്തിന് കേന്ദ്രമന്ത്രിതല സമിതി അംഗീകാരം നല്കിയിരുന്നു. ഇനി മുതല് 5%, 18% എന്നിങ്ങനെ രണ്ട് സ്ലാബുകള് മാത്രമായിരിക്കും ജിഎസ്ടിക്ക് ഉണ്ടാകുക. ഇതിന് ജിഎസ്ടി കൗണ്സിലില് ഇനി അംഗീകാരം ലഭിക്കേണ്ടതുണ്ട്.
