ന്യൂഡല്‍ഹി: ഐഎന്‍എക്സ് മീഡിയ കേസില്‍ അറസ്റ്റിലായ കോണ്‍ഗ്രസ് നേതാവും മുന്‍ കേന്ദ്ര ധനമന്ത്രിയുമായ പി. ചിദംബരത്തെ വ്യാഴാഴ്ച കോടതിയില്‍ ഹാജരാക്കും. ഉച്ച‍യോടെയാകും ഡല്‍ഹി റോസ് അവന്യൂ കോടതിയില്‍ ഹാജരാക്കുക. 14 ദിവസം കസ്റ്റഡിയില്‍ വേണമെന്ന് സിബിഐ കോടതിയില്‍ ആവശ്യപ്പെടും. ജാമ്യാപേക്ഷ ചിദംബരവും നല്‍കും.
ബുധനാഴ്ച രാത്രി ഒമ്ബതിനുശേഷം സിബിഐ സംഘം ഡല്‍ഹി ജോര്‍ബാഗിലുള്ള ചിദംബരത്തിന്‍റെ വസതിയുടെ മതില്‍ചാടിക്കടന്ന് അകത്തെത്തി അദ്ദേഹത്തെ അറസ്റ്റ് ചെയ്യുകയായിരുന്നു. പിന്നീട് ഡല്‍ഹിയിലെ സിബിഐ ആസ്ഥാനത്തേക്ക് കൊണ്ടുപോയി.രാത്രി 12.30 വരെ ചിദംബരത്തെ ചോദ്യം ചെയ്തു. എന്നാല്‍ ചോദ്യങ്ങള്‍ക്കൊന്നും അദ്ദേഹം തൃപ്തികരമായ മറുപടി നല്‍കിയില്ലെന്നാണ് അറിയുന്നത്. രാത്രിയില്‍ ഭക്ഷണവും കഴിച്ചില്ല. ഡോക്ടര്‍മാരെത്തി അദ്ദേഹത്തിന്‍റെ ആരോഗ്യനില ഇതിനിടെ പരിശോധിക്കുകയും ചെയ്തു.
ചിദംബരത്തിന്‍റെ മുന്‍കൂര്‍ ജാമ്യാപേക്ഷ നേരത്തേ ഡല്‍ഹി ഹൈക്കോടതി തള്ളിയിരുന്നു. ഇതോടെ സിബിഐയും എന്‍ഫോഴ്സ്മെന്‍റ് ഡയറക്ടറേറ്റും(ഇഡി) അറസ്റ്റ് നടപടികള്‍ ഊര്‍ജിതമാക്കിയിരുന്നു. ചൊവ്വാഴ്ച വൈകുന്നേരം മുതല്‍ നിരവധി തവണ ചിദംബരത്തിന്‍റെ വസതിയിലെത്തിയ സിബിഐ സംഘം അദ്ദേ ഹത്തിനെതിരേ ലുക്ക്‌ഔട്ട് നോട്ടീസ് പുറത്തിറക്കിയിരുന്നു.ചിദംബരം നല്‍കിയ ഹര്‍ജി സുപ്രീംകോടതി വെള്ളിയാഴ്ച പരിഗണിക്കണിച്ചേക്കുമെന്ന സൂചനയില്‍ സിബിഐയും എന്‍ഫോഴ്സ്മെന്‍റ് ഡയറക്ടറേറ്റും ഇന്ന ലത്തന്നെ സുപ്രീം കോടതിയില്‍ തടസ ഹര്‍ജി ഫയല്‍ ചെയ്തു. തങ്ങളുടെ ഭാഗം കേള്‍ക്കാതെ ഉത്തരവ് പുറപ്പെടുവിക്കരുതെന്നാണ് സിബിഐയും ഇഡിയും ആവശ്യപ്പെട്ടത്.
