പോപ്പുലര് ഫ്രണ്ട് സംസ്ഥാന സെക്രട്ടറി സി.എ.റൗഫ് പിടിയില്. പാലക്കാട് പട്ടാമ്ബി കരിമ്ബുള്ളിയിലെ വീട്ടില് നിന്നാണ് എന്ഐഎ സംഘം റൗഫിനെ പിടികൂടിയത്. എന് ഐ എ സംഘം വീട് വളഞ്ഞ് പിടികൂടുകയായിരുന്നു. തമിഴ്നാട്ടില് ഒളിവിലായിരുന്ന റൗഫ് വീട്ടിലെത്തിയപ്പോഴാണ് എന്ഐഎ സംഘം വീടുവളഞ്ഞത്.
കഴിഞ്ഞ കുറച്ച് കാലമായി കേരള പോലീസും എന്ഐഎ സംഘവും റൗഫിനെ തേടിക്കൊണ്ടിരിക്കുകയായിരുന്നു. പോപപുലര് ഫ്രണ്ടിനെ നിരോധിക്കുന്നതിന് മുന്പ് തന്നെ ഇയാള്ക്കായി തിരച്ചില് നടക്കുന്നുണ്ടായിരുന്നു. പോപ്പുലർ ഫ്രണ്ട് ഹര്ത്താല് പ്രഖ്യാപിച്ചതിന് പിന്നാലെ ഇയാള് ഒളിവില് പോയിരുന്നു.
വീട്ടിലുള്പ്പടെ റെയ്ഡ് നടത്തിയെങ്കിലും പിടികൂടാന് കഴിഞ്ഞിരുന്നില്ല. റൗഫ് പോകാനിടയുള്ള സ്ഥലങ്ങള്, ബന്ധപ്പെടാന് സാധ്യതയുള്ളവര് എന്നിവരെ എന്ഐഎ കൃത്യമായി നിരീക്ഷിച്ച് വരികയായിരുന്നു. ഇന്നലെയാണ് ഇയാള് വീട്ടിലുണ്ടെന്ന വിവരം ലഭിച്ചത്.തുടര്ന്ന് 12 മണിയോടെ വീട്ടിലെത്തുകയും പന്ത്രണ്ടരയോടെ വീട് വളഞ്ഞ് ഇയാളെ അറസ്റ്റ് ചെയ്യുകയുമായിരുന്നു.