ചെന്നൈ വ്യവസായി മുഹമ്മദ് ഷർഷാദ് നൽകിയ പരാതിയിൽ മുൻ മുഖ്യമന്ത്രി പിണറായി വിജയന്റെ പൊളിറ്റിക്കൽ സെക്രട്ടറിയായിരുന്ന പി. ശശിക്കെതിരെ അന്വേഷണത്തിന് നീക്കം. പരാതിയിൽ ഉന്നയിച്ച ആരോപണങ്ങൾ അന്വേഷിക്കുന്നതിനായി പ്രത്യേക സംഘത്തെ നിയോഗിച്ചെന്നാണ് റിപ്പോർട്ട്. അന്വേഷണത്തിന് ഉന്നത പൊലീസ് ഉദ്യോഗസ്ഥരുടെ മേൽനോട്ടവും ഉണ്ടാകും.തന്നെ കള്ളക്കേസിൽ കുടുക്കി ബുദ്ധിമുട്ടിച്ചെന്നും വ്യക്തിവൈരാഗ്യത്തിന്റെ പേരിൽ പൊലീസ് സംവിധാനത്തെ ദുരുപയോഗം ചെയ്തെന്നുമാണ് ഷർഷാദിന്റെ പ്രധാന ആരോപണം. വിഷയത്തിൽ മുഖ്യമന്ത്രിക്കും ആഭ്യന്തര മന്ത്രിക്കും നൽകിയ പരാതിയുടെ അടിസ്ഥാനത്തിലാണ് അന്വേഷണം ആരംഭിച്ചത്.
കൊച്ചി സിറ്റി പൊലീസ് കമ്മിഷണറേറ്റിൽ പരാതിക്കാരന്റെ മൊഴിയും രേഖപ്പെടുത്തിയതായി റിപ്പോർട്ടുകളുണ്ട്.സിപിഐഎം പോളിറ്റ് ബ്യൂറോയ്ക്ക് നൽകിയ തന്റെ പരാതി എങ്ങനെ ചോർന്നു, ഇതിന് പിന്നിൽ പ്രവർത്തിച്ചവർ ആരെല്ലാം തുടങ്ങിയ കാര്യങ്ങളും അന്വേഷിക്കണമെന്ന് ഷർഷാദ് ആവശ്യപ്പെട്ടിട്ടുണ്ട്. പി. ശശിയടക്കമുള്ളവരുടെ ഫോൺ രേഖകളും വാട്സ്ആപ്പ് ചാറ്റുകളും പരിശോധിക്കണമെന്നും പരാതിയിൽ ആവശ്യപ്പെട്ടതായി റിപ്പോർട്ടുകൾ പറയുന്നു.കൊച്ചി പൊലീസ് കമ്മിഷണറുടെ നേതൃത്വത്തിലുള്ള അന്വേഷണത്തിൽ വിശ്വാസമില്ലെന്ന് ചൂണ്ടിക്കാട്ടി ഷർഷാദ് ഡിജിപിക്ക് വീണ്ടും പരാതി നൽകിയിരുന്നു. ഇതിന് പിന്നാലെയാണ് അന്വേഷണം പ്രത്യേക സംഘത്തിന് കൈമാറിയത്. പരാതിയിലെ ആരോപണങ്ങൾ അന്വേഷണത്തിലൂടെ പരിശോധിച്ച ശേഷമായിരിക്കും തുടർനടപടികൾ സ്വീകരിക്കുക.
