Police seized synthetic drugs valued at about Rs two crore. Credit: Twitter/ @ips_patil
ബംഗളൂരു: ബംഗളൂരു നഗരത്തില്‍ നൈജീരിയന്‍ പൗരന്‍റെ നേതൃത്വത്തില്‍ വാടകവീട്ടില്‍ പ്രവര്‍ത്തിച്ചുവന്നിരുന്ന മയക്കുമരുന്ന് ഫാക്‌ടറി കണ്ടെത്തി. രഹസ്യ വിവരത്തെത്തുടര്‍ന്ന് സിറ്റി ക്രൈംബ്രാഞ്ചിന്‍റെ നാര്‍കോട്ടിക്സ് വിഭാഗം നടത്തിയ പരിശോധനയിലാണ് ഇലക്‌ട്രോണിക്സ് സിറ്റി ഫേസ് ഒന്ന് ചാമുണ്ഡി ലേഔട്ടിലെ വീട്ടില്‍ മയക്കുമരുന്ന് ഫാക്‌ടറി കണ്ടെത്തിയത്.
ഇവിടെനിന്ന് മാരക മയക്കുമരുന്നായ ക്രിസ്റ്റല്‍ രൂപത്തിലുള്ള നാലു കിലോഗ്രാം എംഡിഎംഎ കണ്ടെടുത്തു. രണ്ടു കോടി രൂപ വിലമതിക്കുന്നതാണിത്. കൂടാതെ മയക്കുമരുന്ന് നിര്‍മിക്കാനുപയോഗിക്കുന്ന അസെറ്റോണ്‍, ഹൈപ്പോ ഫോസ്ഫറസ് ആസിഡ്, സോഡിയം ഹൈഡ്രോക്സൈഡ്, ആസിഡ് എന്നിവയും കണ്ടെത്തി.
ഇവിടെ ക്രിസ്റ്റല്‍ രൂപത്തിലുള്ള എംഡിഎംഎ ഗുളികകള്‍ നിര്‍മിച്ച്‌ കര്‍ണാടകയിലും വിവിധ സംസ്ഥാനങ്ങളിലും വിദേശരാജ്യങ്ങളിലും വില്പന നടത്തിയിരുന്നതായി സിറ്റി പോലീസ് ജോയിന്‍റ് കമ്മീഷണര്‍ (ക്രൈം) സന്ദീപ് പാട്ടീല്‍ അറിയിച്ചു.
