രാജ്യത്തെ പതിനഞ്ചാമത് രാഷ്ട്രപതിയായി ദ്രൗപദി മുര്മു തെരഞ്ഞെടുക്കപ്പെട്ടു. രാജ്യത്തെ ഗോത്ര വിഭാഗത്തില് നിന്ന് രാഷ്ട്രപതി സ്ഥാനത്തേക്ക് വരുന്ന ആദ്യ വ്യക്തിയാണ് ദ്രൗപദി മുര്മു.
776 പാര്ലമെന്റംഗങ്ങളും 4033 നിയമസഭാംഗങ്ങളും ഉള്പ്പെടുന്ന 4809 പേരാണ് വോട്ടുചെയ്തത്. നാല്പ്പത്തിയൊന്ന് പാര്ട്ടികളുടെ പിന്തുണ ദ്രൗപദി മുര്മുവിനുണ്ടായിരുന്നു. സംയുക്ത പ്രതിപക്ഷ സ്ഥാനാര്ത്ഥിയായി യശ്വന്ത് സിന്ഹയെ തോല്പ്പിച്ചാണ് ദ്രൗപതി മുര്മ്മു രാഷ്ട്രപതി പദത്തിലേക്കെത്തിയത്.
‘2022 ലെ പ്രസിഡന്റ് തെരഞ്ഞെടുപ്പിലെ വിജയത്തിന് ദ്രൗപദി മുര്മുവിനെ ഞാന് ഹൃദയപൂര്വ്വം അഭിനന്ദിക്കുന്നു. ഇന്ത്യയുടെ 15-ാമത് രാഷ്ട്രപതി എന്ന നിലയില് അവര് ഭരണഘടനയുടെ സംരക്ഷകയായി ഭയമോ പക്ഷപാതമോ കൂടാതെ പ്രവര്ത്തിക്കുമെന്ന് ഞാന് പ്രതീക്ഷിക്കുന്നു – തീര്ച്ചയായും, ഓരോ ഇന്ത്യക്കാരനും പ്രതീക്ഷിക്കുന്നു. ഞാന് എന്റെ നാട്ടുകാരോടൊപ്പം ചേര്ന്ന് അവര്ക്ക് ആശംസകള് നേരുന്നു,’ പ്രതിപക്ഷ പാര്ട്ടികളുടെ സംയുക്ത സ്ഥാനാര്ത്ഥിയായി മത്സരിച്ച യശ്വന്ത് സിന്ഹ ട്വീറ്റ് ചെയ്തു.
നിലവിലെ രാഷ്ട്രപതി രാം നാഥ് കോവിന്ദിന്റെ കാലാവധി ജൂലൈ 24ന് അവസാനിക്കും. പുതിയ രാഷ്ട്രപതി ജൂലൈ 25ന് സത്യപ്രതിജ്ഞ ചെയ്ത് സ്ഥാനമേല്ക്കും.