തമിഴ്‌നാട്ടിലെ വെല്ലൂര്‍ ജില്ലയില്‍ നിര്‍മാണത്തിലിരുന്ന ചര്‍ച്ച് തകര്‍ന്നുവീണ് രണ്ടുപേര്‍ മരിച്ചു. 12 പേരെ രക്ഷപ്പെടുത്തി വിവിധ ആശുപത്രികളില്‍ പ്രവേശിപ്പിച്ചു. കാട്ട്പാടിക്ക് സമീപം മണ്ടി കൃഷ്ണപുരത്തുള്ള, സി എസ് ഐ സഭയുടെ കീഴിലുള്ള ചര്‍ച്ചാണ് തകര്‍ന്നത്.
ചര്‍ച്ചിന്റെ മേല്‍ക്കൂര കോണ്‍ക്രീറ്റ് ചെയ്യുന്നതിനിടെ തകര്‍ന്നു വീഴുകയായിരുന്നു. അപകടം നടക്കുമ്പോള്‍ 14 ലധികം തൊഴിലാളികള്‍ ഇവിടെയുണ്ടായിരുന്നു. തകര്‍ന്ന കെട്ടിടത്തില്‍ നിന്ന് ആളുകളെ രക്ഷിച്ച് ആശുപത്രിയിലേക്ക് മാറ്റുന്നതിനിടെ ഒരാള്‍ മരിച്ചു. പിന്നീട് അവശിഷ്ടങ്ങള്‍ക്കിടയില്‍ നിന്ന് ഒരു മൃതദേഹം കണ്ടെത്തുകയും ചെയ്തു. ഒരാള്‍ കൂടി കുടുങ്ങിക്കിടക്കുന്നതായി സംശയമുണ്ടെന്ന് ജില്ലാ കലക്ടര്‍ അറിയിച്ചു.
