ഗുസ്തി താരവും ടോക്കിയോ ഒളിംപിക്‌സ് വെങ്കല മെഡല്‍ ജേതാവുമായ ബജ്രംഗ് പൂനിയയ്ക്ക് നാല് വര്‍ഷത്തെ വിലക്ക്. ഉത്തേജക പരിശോധനക്ക് വിസമ്മതിച്ചതിനും പരിശോധനാ സാംപിള്‍ നല്‍കാതിരുന്നതിനുമാണ് ദേശീയ ഉത്തേജക വിരുദ്ധ ഏജന്‍സിയുടെ (NADA) നടപടി.ഏപ്രില്‍ 23 മുതല്‍ നാലു വര്‍ഷത്തേക്കാണ് വിലക്കെന്ന് നാഡ അറിയിച്ചു. ഇതിനെത്തുടര്‍ന്ന് വേള്‍ഡ് റെസ്ലിംഗ് ഗവേണിംഗ് ബോഡിയും (UWW) ബജ്റംഗിനെ സസ്‌പെന്‍ഡ് ചെയ്തു.
മാര്‍ച്ച് പത്തിനായിരുന്നു നാഡയുടെ പരിശോധനയ്ക്ക് പൂനിയ വിസമ്മതിച്ചത്. കാലാവധി കഴിഞ്ഞ കിറ്റുകള്‍ പരിശോധനയ്ക്ക് നല്‍കിയെന്ന കാരണത്താലായിരുന്നു ഇത്.പരിശോധനയ്ക്ക് തയാറാണെന്നും എന്നാല്‍ കിറ്റുകളില്‍ വ്യക്തത വേണമെന്നും പൂനിയ ‘നാഡ’യോട് ആവശ്യപ്പെട്ടിരുന്നു. വിലക്ക് വന്നതോടെ നാലു വര്‍ഷം ഗുസ്തി മത്സരങ്ങളില്‍ പങ്കെടുക്കാനോ പരിശീലകനാകാനോ പുനിയക്ക് കഴിയില്ല.
