മോഹന്‍ലാലിനെ നായകനാക്കി വി.എ. ശ്രീകുമാര്‍ മേനോന്‍ സംവിധാനം ചെയ്യുന്ന രണ്ടാമൂഴത്തിന്‍റെ ഷൂട്ടിംഗ് 2019 ജൂലൈയില്‍ ആരംഭിക്കും. എം.ടി. വാസുദേവന്‍ നായരുടെ രണ്ടാമൂഴം എന്ന നോവലിനെ ആസ്പദമാക്കിയാണ് ഈ സിനിമയൊരുങ്ങുന്നത്.
ഷൂട്ടിംഗ് അടുത്ത വര്‍ഷം ആരംഭിക്കുമെന്ന് ബി.ആര്‍. ഷെട്ടി ട്വിറ്ററിലൂടെയാണ് അറിയിച്ചത്. “ഇന്ത്യന്‍ സിനിമയിലെയും ലോക സിനിമയിലെയും മികച്ച പല താരങ്ങളും ഈ സിനിമയില്‍ മോഹന്‍ലാലിനൊപ്പമുണ്ടാകും. പ്രീ പ്രൊഡക്ഷന്‍ ജോലികള്‍ അവസാനഘട്ടത്തിലാണ്. ചിത്രത്തെ കുറിച്ചുള്ള ഒൗദ്യോഗിക പ്രഖ്യാപനം വലിയൊരു ചടങ്ങില്‍വച്ച്‌ ഉടന്‍ തന്നെയുണ്ടാകും’. ഷെട്ടി പറഞ്ഞു. മാത്രമല്ല ശ്രീകുമാര്‍ മേനോനുമൊത്തുള്ള ചിത്രവും അദ്ദേഹം പങ്കുവെച്ചിട്ടുണ്ട്.
നൂറ് കോടി ബജറ്റിലൊരുങ്ങുന്ന ചിത്രം രണ്ടു ഭാഗങ്ങളായി റിലീസ് ചെയ്യാനാണ് തീരുമാനം. ശ്രീകുമാര്‍ മേനോന്‍ സംവിധാനം ചെയ്യുന്ന മോഹന്‍ലാല്‍ ചിത്രം ഒടിയന്‍ ഒക്ടോബറിലാണ് റിലീസ് ചെയ്യുന്നത്.
