മലയാളിക്കിന്ന് വിഷു. കണിക്കൊന്നയുടെ സമൃദ്ധിയും കൈനീട്ടവുമായി ഐശ്വര്യത്തിന്റെ വിഷു ആഘോഷിക്കുകയാണ് കേരളക്കര. മേടമാസം ഒന്നാം തീയതിയാണ് വിഷുവായി ആഘോഷിക്കുന്നത്.
ഓട്ടുരുളിയിൽ നിറയുന്ന കാർഷിക സമൃദ്ധി. കണിവെള്ളരിയും ചക്കയും, മാങ്ങയും, നാളികേരവും പഴവർഗങ്ങളും, ധാന്യങ്ങളും. തെളിഞ്ഞ് കത്തുന്ന നിലവിളക്കിന് മുന്നിൽ ചന്തം ചാർത്തി കൃഷ്ണവിഗ്രഹം. കോടി മുണ്ടും വാൽക്കണ്ണാടിയും വസന്തം വാരി വിതറുന്ന കണിക്കൊന്നപ്പൂവും. ഈ വിഷുക്കണി കാഴ്ചയും കൈനീട്ടവും ഇനിയുള്ള ഒരു വർഷത്തെ പ്രതീക്ഷയാണ്.