ഫേസ്ബുക്കിലൂടെ അശ്ലീല സന്ദേശം അയച്ചയാള്‍ക്കെതിരെ രൂക്ഷ പ്രതികരണവുമായി നടി സാധിക വേണുഗോപാല്‍. നഗ്നചിത്രം അയച്ച വിനീത് എന്ന യുവാവിനെയാണ് താരം തുറന്നുകാട്ടിയത്. മെസേജിന്റെ സ്‌ക്രീന്‍ഷോട്ടും സാധിക പങ്കുവച്ചിട്ടുണ്ട്. കോഴിക്കോട് സ്വദേശിയും സീരിയല്‍, ചലച്ചിത്ര നടിയുമായ സാധികയുടെ ഫേസ് ബുക്ക് പോസ്റ്റ് വൈറലായി.
സാധികയുടെ കുറിപ്പ് ഇങ്ങനെ :
ഇതുപോലുള്ള ജന്മങ്ങള്‍ ആണ് ആണിന്റെ ശാപം.. നട്ടെല്ലിന്റെ സ്ഥാനത്തു റബര്‍ വച്ചു പിടിപ്പിച്ച, ജനിപ്പിച്ച അമ്മമാര്‍ക്ക് പോലും മനസ്സമാധാനം കൊടുക്കാത്ത ജന്മങ്ങള്‍..
പെണ്ണ് എന്ന വാക്കിന് കാമം എന്ന് മാത്രം അര്‍ത്ഥം അറിയാവുന്ന പാഴ്ജന്മങ്ങള്‍. ഇതുപോലത്തെ ജന്മങ്ങള്‍ കാരണം ആണ് പലരും ഇന്‍ബോക്സ് തുറക്കാത്തതും മെസേജിന് റിപ്ലൈ തരാത്തതും. ഒരുപാട് ഒന്നും വേണ്ട ഇതുപോലത്തെ കുറച്ചുപേര്‍ മതി ആണിന്റെ വില കളയാന്‍.
പെണ്ണിന്റെ കാല് കണ്ടാല്‍ കുഴപ്പം, പൊക്കിള്‍ കണ്ടാല്‍ കുഴപ്പം, വയറു കണ്ടാല്‍ കുഴപ്പം, സത്യത്തില്‍ ഇതൊക്കെ ആരുടെ കുഴപ്പം ആണ്? ഇതൊന്നും കണ്ടാലും ഒരു കുഴപ്പവും ഇല്ലാത്ത നട്ടെല്ലുള്ള നല്ല അസല്‍ ആണ്‍കുട്ടികള്‍ ഉണ്ട് ഈ നാട്ടില്‍.
അപ്പൊ ഇതൊന്നും ആണിന്റെയോ പെണ്ണിന്റെയോ കുഴപ്പം അല്ല. വികാരം മനുഷ്യസഹജം ആണ്, വികാരത്തെ നിയന്ത്രിക്കാന്‍ കഴിവില്ലാത്തതു ആ വ്യക്തിയുടെ പ്രശ്നം ആണ്.
ഞാന്‍ എന്താവണം എന്നത് ഞാന്‍ തീരുമാനിക്കണം. ഞാന്‍ എന്ന വ്യക്തി എന്റെ വീട്ടിനു പുറത്തുള്ള സ്ത്രീകളെ/പുരുഷന്മാരെ എങ്ങനെ കാണണം എന്നത് എന്റെ തീരുമാനം ആണ്.
അല്ലാതെ സാഹചര്യമോ വളര്‍ത്തു ദോഷമോ ലിംഗദോഷമോ അല്ല. അത് ആര്‍ക്കും വന്നു പഠിപ്പിച്ചു തരാന്‍ ഒക്കില്ല. പരസ്പര ബഹുമാനം എന്നൊന്ന് ഉണ്ട് അത് മനുഷ്യന്‍ ആയാലും മൃഗം ആയാലും സസ്യം ആയാലും അത് പ്രകൃതി നിയമം ആണ്.
അത് മനസിലാവാനുള്ള മാനസിക വളര്‍ച്ച ഇല്ലെങ്കില്‍ പെണ്ണിനെ കണ്ടാല്‍ ഉണ്ടാകുന്ന ആ വികാരം ഇനിയൊരു പെണ്‍കുഞ്ഞിന് ജന്മം നല്കാതിരിക്കട്ടെ എന്ന് ഞാന്‍ പ്രാര്‍ത്ഥിക്കാം.
ഞാന്‍ ഇടുന്ന ഫോട്ടോയും എന്റെ വസ്ത്രധാരണ രീതിയുമാണ് പ്രശ്നം എന്ന് പറയാന്‍ വരുന്നവരോട് ഒന്നേ പറയാനുള്ളൂ.
എന്റെ വ്യക്തി സ്വാതന്ത്ര്യം എന്നെ പീഡിപ്പിക്കാനുള്ള നിങ്ങളുടെ അവകാശം അല്ല. നിങ്ങളുടെ മനോരോഗം എന്റെ അവകാശങ്ങളുടെ മേല്‍ അടിച്ചേല്പിക്കരുത്.
