കോഴിക്കോട്: താമരശേരി കട്ടിപ്പാറ പഞ്ചായത്തിലെ കരിഞ്ചോലയിലുണ്ടായ ഉരുള്പൊട്ടലില് കാണാതായവര്ക്കായി തെരച്ചില് ഇന്നും തുടരും. ഇതുവരെ എട്ടു പേരുടെ മൃതദേഹമാണ് കണ്ടെത്തിയത്. ഒരു കുടുംബത്തിലെ ആറു പേരെ കൂടി ഇനിയും കണ്ടെത്താനുണ്ട്. ഇന്ന് രാവിലെ തന്നെ തെരച്ചില് പുനരരാംഭിച്ചു.
ദേശീയ ദുരന്തനിവാരണ സേനയും അഗ്നിശമനസേനയും നാട്ടുകാരുമാണ് തെരച്ചില് നടത്തുന്നത്. ദേശീയ ദുരന്തനിവാരണ സേനയുടെ ഒരു സംഘം കൂടി സ്ഥലത്തെത്തിയിട്ടുണ്ട്. വെള്ളിയാഴ്ച നടത്തിയ തെരച്ചിലില് ഒരു കുട്ടിയുടെ മൃതദേഹം കണ്ടെത്തിയിരുന്നു. മരിച്ച എട്ടുപേരില് നാലു പേരും കുട്ടികളാണ്.
കരിഞ്ചോലമലയുടെ താഴെ താമസിക്കുന്ന കരിഞ്ചോല ഹസന്, അബ്ദുറഹിമാന്, അബ്ദുള് സലിം, ഈര്ച്ച അബ്ദുറഹിമാന്, കൊടശേരിപൊയില് പ്രസാദ് എന്നിവരുടെ വീടുകളാണ് അപകടത്തില് തകര്ന്നത്.