കളമശ്ശേരി (എറണാകുളം): ഇടതുസ്ഥാനാര്ഥി പി. രാജീവിനെ അപകീര്ത്തിപ്പെടുത്തുന്ന നോട്ടീസ് പ്രചരിപ്പിച്ചതായ പരാതിയില് പൊലീസ് കേസെടുത്തു. ഏലൂരില് 29 പേര്ക്കെതിരെയും കളമശ്ശേരിയില് രണ്ടുപേര്ക്കെതിരെയുമാണ് കേസെടുത്തത്. സി.പി.എം ഏലൂര് ഈസ്റ്റ് ലോക്കല് കമ്മിറ്റിയുടെ പരാതിയിലാണ് ഏലൂരിലെ കേസ്.
എന്നാല്, കളമശ്ശേരി കൂനംതൈ അന്തുമുക്കില് നോട്ടീസ് വിതരണം നടത്തിവന്നവരെ എല്.ഡി.എഫ് പ്രവര്ത്തകര് തടഞ്ഞുനിര്ത്തി പൊലീസിന് കൈമാറിയതിനെത്തുടര്ന്നാണ് കേസ്. പ്രിന്ററുടെയോ പബ്ലിഷറുടെയോ പേരില്ലാതെ പത്രത്തിെന്റ വലുപ്പത്തില് പി.രാജീവിനെ വ്യക്തിപരമായി അപകീര്ത്തിപ്പെടുത്തുന്നതിനും അവഹേളിക്കുന്നതിനുമായി ഇറക്കിയതാണെന്നാണ് ആരോപണം.
നാലുപേജ് വരുന്നതാണ് നോട്ടീസുകള്. എന്നാല്, നോട്ടീസ് വിതരണത്തില് തങ്ങള്ക്ക് ബന്ധമില്ലെന്ന് യു.ഡി.എഫ് നേതാക്കള് പറഞ്ഞു.